ABŞ-ın Türkiyə və Azərbaycandakı keçmiş səfiri, Vaşinqtondakı Atlantika Şurası Avrasiya Mərkəzinin direktoru Ross Uilson (Ross Wilson) Konqresi Ermənistan və Azərbaycan arasında Dağlıq Qarabağ münaqişəsinin sülh yolu ilə həllini dəstəkləməyə çağırıb. APA-nın Vaşinqton müxbirinin məlumatına görə, cənab Uilson bunu “Türkiyənin yeni xarici siyasət istiqaməti: ABŞ-Türkiyə münasibətlərinə təsiri” mövzusunda iyulun 28-də ABŞ Konqresinin Xarici Əlaqələr Komitəsində keçirilən dinləmələrdə bildirib. Dinləmələrə qondarma “erməni soyqırımı” qətnaməsini dəstəkləyən Hovard Berman sədrlik edib.

R. Uilson Türkiyə-Ermənistan münasibətlərinin normallaşmasına və Dağlıq Qarabağ münaqişəsinə toxunaraq bildirib ki, Ermənistan və Azərbaycan arasında nizamlanma olmasa, regionda sülhməramlı, yaradıcı layihə və planları sona çatdırmaq asan olmayacaq: “Təəssüf ki, Ermənistan və Türkiyə liderləri bildiriblər ki, hazırda onlar münasibətlərin normallaşması və sərhədlərin açılmasını nəzərdə tutan protokolları ratifikasiya edə bilməzlər. Məncə, onların hələ də Dağlıq Qarabağ münaqişəsinin və türklərlə ermənilər arasında problemlərin həlli üçün lazım olan etimadı yaratmaq imkanları var”.

Keçmiş səfir qeyd edib ki, Cənubi Qafqaz qeyri-sabit və kövrək regiondur. Onun sözlərinə görə, 2008-ci ildə baş vermiş Rusiya-Gürcüstan müharibəsi Türkiyə və Ermənistan arasında barışığa təkan verib: “Rusiyanın Gürcüstana müdaxiləsindən bir ay sonra prezident Sarkisyanla prezident Gülün İrəvanda görüşündən belə bir rəmzi ifadə doğurdu ki, “Bizim Qafqazın gələcəyi haqqında təsəvvürlərimiz var və indi Gürcüstanda baş verənlərin bura dəxli yoxdur. Bizi öz aramızda mövcud olan daha mürəkkəb məsələlər düşündürür və biz onların həllinə çalışırıq”.

Təəssüf ki, hər iki tərəf belə bir nəticəyə gəldi ki, hazırda daha irəliyə getmək imkanları yoxdur”. ABŞ və Türkiyə arasında qısamüddətli maraqlar haqqında danışan cənab Uilson Kipr, Yunanıstan, Balkanlar və Qara dənizlə yanaşı, ABŞ-Türkiyə münasibətlərinin gündəmində olan enerji, terrorizm, Əfqanıstan və Pakistan kimi məsələlərə də toxunub: “Zənnimcə bunu demək kifayət edər ki, bu məsələlərlə bağlı məqsədlərimiz eynidir. Düzdür, baxışlarda müxtəliflik var, amma ABŞ və Türkiyə bu sahədə yaxşı əməkdaşlıq edir”. Dinləmələr zamanı Konqres üzvlərini narahat edən məsələlərdən biri də Türkiyə xarici siyasətinin müxtəlif istiqamətləri, xüsusilə də İran və İsraillə bağlı tərəfləri olub.