Ermənistan Dağlıq Qarabağ münaqişəsinin həllinə dair aparılan danışıqlar prosesini tərk etməli və Azərbaycanın ərazi bütövlüyünü tanımalıdır.  Milli.Az xəbər portalının news.am saytına istinadən verdiyi məlumata görə, bunu «Sosiometr» Sosioloji Mərkəzinin direktoru Aqaron Adibekyan bildirib.

O, hesab edir ki, danışıqlar Azərbaycanla Dağlıq Qarabağ separatçıları arasında aparılmalı, Ermənistan isə beynəlxalq ictimaiyyətlə birlikdə «tərəflərin əldə edəcəyi istənilən razılaşmanı qəbul etməlidir».

Sosioloq hesab edir ki, Ermənistan məhz bu halda işğalçı, təcavüzkar adlarını üzərindən götürə bilər: «Dağlıq Qarabağ əhalisinin 90%-i problemin bu cür həllilə razılaşar. Onlar Azərbaycandan və ya hansısa kənar qüvvədən deyil, Ermənistandan qorxurlar. Düşünürlər ki, Yerevan onları problemləri ilə baş-başa qoya bilər».