Ermənistan prezidenti Serj Sarkisyan Azərbaycan əleyhinə növbəti sərsəm bəyanat ilə çıxış edib. O. Azərbaycanın işağl olunmuş torpaqlarla bağlı qətnaməni BMT Baş Assambleyasının 65-ci sessiyasının müzakirəsinə çıxarmasından gileylənib. Sarkisyan bildirib ki, Azərbaycan bu qətnaməni növbəti dəfə müzakirəyə çıxarmaqla kobud səhvə yol verir.  

 Qeyd edək ki, rəsmi Bakı sentyabrın 9-da “Azərbaycanın işğal olunmuş ərazilərində insan haqları sahəsində beynəlxalq humanitar hüquq normaları və beynəlxalq standartlara riayət olunmasına” dair Qətnamə Layihəsini BMT Baş Assambleyasının 65-ci sessiyasının səsverməsinə çıxarmağı planlaşdırır.  

 Ermənistan prezidentinin sözlərinə görə, erməni tərəfi buna müvafiq addımlarla cavab verəcək və “bu bizi məqsədlərimizə daha da yaxınlaşdıracaq”  

 “Bizim fəaliyyətmiz həmişə təkcə Azərbaycanın deyil, həmçinin digər ölkələrin də geriyə yol olmadığını anlamasına yönəldilməldir. Dağlıq Qarabağın hansısa şəkildə Azərbaycanın tərkibinə qaytarılması istisnadır. Çox güman ki, sentyabrın 9-da Azərbaycan tərəfindən BMT Baş Assambleyasının müzakirəsinə çıxarılacaq qətnamənin qəbul olunub-olunmayacağı Ermənistanın siyasi və iqtisadi həyatına mühüm təsir göstərməyəcək”, - deyə Sarkisyan bildirib.

Ermənistan prezidenti kimlərin qətnamənin “lehinə”, kimlərin isə “əleyhinə” səs verəcəyini də proqnozlaşdırıb: “Çox güman ki, İslam Konfransı Təşkilatı ölkələri qətnamənin “lehinə”, Dağlıq Qarabağ münaqişəsinin sülh yolu ilə həllini istəyən dövlətlər isə sənədin “əleyhinə” səs verəcək”.