“Cəbhə xəttində atəşkəsin pozulması bir daha Ermənistanın işğalçılıq mahiyyətindən xəbər verir”. APA-nın məlumatına görə, bunu YAP-ın saytına açıqlamasında “Azərbaycan Respublikası Dağlıq Qarabağ bölgəsinin azərbaycanlı icması” İctimai Birliyinin sədri Bayram Səfərov deyib.

B. Səfərov bildirib ki, Ermənistanla Rusiya arasında imzalanan yeni hərbi müqavilədən işğalçı dövlət öz məqsədləri üçün istifadə etmək istəyir.

O, Rusiyanın 102-ci hərbi bazadan Ermənistanın işğalçılıq siyasətini genişləndirmək üçün istifadə etməsinə imkan veriləcəyinə inanmadığını da qeyd edib: “Rusiya prezidentinin ölkəmizə səfəri zamanı səsləndirdiyi fikirlər buna əsas verir. Bu hərbi müqavilənin imzalanması isə Ermənistanın Rusiyadan asılılığı daha da artırır”.

B. Səfərov Ermənistanın müstəqil dövlət olmadığını da bildirib: “Ermənistan müstəqil dövlət deyil. Bu müqavilə işğalçı dövlətin qeyri-müstəqilliyini daha da gücləndirir. Ermənilər kim pul verirsə, onların tərəfinə keçir. Yəqin ki, Rusiya həmin müqaviləni imzalamaqla Ermənistanın başqa dövlətlərə sığınmasına imkan verməyib”.