ATƏT-in fəaliyyətdə olan sədri, Qazaxıstanın xarici işlər naziri Kanat Saudabayev bəyanatla çıxış edib. APA-nın Qazaxıstan XİN-in mətbuat xidmətinə istinadən verdiyi məlumata görə, K. Saudabayev son vaxtlar Dağlıq Qarabağ münaqişəsi zonasındakı təmas xətti boyunca atəşkəs rejiminin pozulmasını qətiyyətlə pisləyib.

O, hər iki tərəfdən insan itkilərinin sayının artmasının ciddi narahatlıq yaratdığını söyləyib: “ATƏT-in fəaliyyətdə olan sədri bildirir ki, istənilən atəşkəs pozuntusu konstruktiv dialoqun fəallaşdırılması imkanlarını məhdudlaşdırmaqla Minsk konfransı çərçivəsində aparılan danışıqlar prosesini pozur. Bununla əlaqədar fəaliyyətdə olan sədr həmsədrlərin sentyabrın 6-da verdikləri və tərəfləri atəşkəs razılaşmalarına riayət etməyə, qarşılıqlı ittihamlardan çəkinməyə, təmkinli olmağa çağıran bəyanatını dəstəkləyir. Həmsədrlər tərəfindən ATƏT-in Astana sammiti ərəfəsində münaqişənin həllinə dair kompromis modellər axtarışının intensivləşdirilməsi üzrə payızda planlaşdırılan tədbirlər yalnız münaqişə tərəflərinin irəliləyiş əldə olunmasına səmimi maraq göstərməsi halında nəticə verəcək”.