Ermənistan-Azərbaycan, Dağlıq Qarabağ münaqişəsinin hərbi yolla nizamlanması mümkün deyil, bu münaqişəni həll etməyin yeganə yolu tərəflər arasında sülh danışıqlarıdır. Trend-in məlumatına görə, bu barədə cümə axşamı ABŞ-ın Azərbaycandakı səfiri Metyu Brayza mətbuat konfransında deyib.

"Biz həmişə demişik ki, münaqişənin hərbi həlli yoxdur, münaqişənin yeganə nizamlanma yolu hər iki tərəf arasında sülh danışıqları olmalıdır", - Brayza hesab edir.

Brayza, həmçinin, prezidentlərin növbət görüşündən sonra tərəqqiyə ümid etdiyini bildirib.

İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.

BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.